ကဝိပဏ္ဍိတ်မော်ကွန်း

ကဝိပဏ္ဍိတ်မော်ကွန်း

ဘဒ္ဒကမ္ဘာ၊ တည်လာအစ၊ နရသာမိ၊ ဘူပတိလျှင်၊ မုနိလောင်းလျာ၊ မဟာသမ္မတ၊ ထိုကနွယ်လာ၊ ဆက်ကာစိုးဘိ၊ မဇ္ဈိရဋ္ဌ၊ ဒေသတတိုင်း၊ ယှဉ်နှိုင်းတဝ၊ မဟီသက၊ မဏ္ဍလတွင်၊ ပြည်မသညီ၊ ဝေသာလီက၊ စချီရှိခါ၊ ဓညာမည်ရ၊ ရက္ခမဏ္ဍိုင်၊ ရခိုင်ကြငှန်း၊ နန်းနှင့်ထီးစည်၊ ပြည်နှင့်မင်းဆက်၊ မပျက်မကွဲ၊ နန်းပွဲမြင့်ကြာ၊ မြို့ဓညာကို၊ အုပ်ကာစိုးထ၊ စန္ဒသူရိယ၊ စိုးရသခင်၊ မြတ်ဗုဒ္ဓင်ကို၊ ဖူးမြင်လိုဘိ၊ ပင့်ဖိတ်ဘိ၍၊ ကြွလာဟိသော်၊ တောင်ထိပ်ပေါ်သို့၊ ရောက်သော်နဂါး၊ ဘုရားအထံ၊ ဝန္ဒ္ဒိတံပြု၊ သုံးလုဘုန်းမွန်၊ သရဏံနှင့်၊ ပဉ္စံသီလ၊ ပီးရပြီးခါ၊ ကိုးကွယ်ရာကို၊ မကြာတောင်းလျှင်၊ မြတ်ဗုဒ္ဓင်္က၊ ဦးတွင်သုံးသပ်၊ ဆံမြတ်လေးဆူ၊ ပီးယူပြီးခါ၊ သင်ရို့ရွာ၌၊ နီလာတောင်ထွဋ်၊ မွန်မြတ်ယခင်၊ မြတ်ဗုဒ္ဓင်သည်၊ တပင်ဓာတ်ဆံ၊ တည်ဖူးပြန်၏၊ အမှန်လေးဆူ၊ နတ်လူတိုင်းခွင်၊ ဆံရှင်တော်ဓာတ်၊ စေတီမြတ်ကို၊ လုံးပတ်ဆယ့်ခြောက်၊ မြင့်မှောက်လေးတောင်၊ ပုံဆောင်ပြုဘိ၊ မိန့်တော်ဟိလိုက်၊ သက္ကရာဇ်မှာ၊ အစ်ဒွယာတိ၊ သာခိကဆုန်၊ လမြတ်ကြုံက၊ ဝရဒိဝါ၊ ရက်မှာကဠုံ၊ ပြည့်စုံပြီးမြောက်၊ မျက်မှောက်ထင်စွာ၊ ဆဗ္ဗဏ္ဏာကို၊ ရာဇာဘုရင်၊ မြင်ချင်စိတ်ဇော၊ ဓိဌာန်သောခါ၊ ခြောက်ဖြာရောင်ခြည်၊ ထွက်သည်များစွာ၊ စန္ဒာသူရိယ၊ စိုးရဘုရင်၊ ရွှီနန်းရှင်နှင့်၊ မတ်လျှင်ထပ်လောင်း၊ ပြည်သူပေါင်းရို့၊ သောင်းသောင်းကြော်ကြော်၊ သာဓုခေါ်၍၊ ဓာတ်တော်ပွဲကြီး၊ အံ့ရီးမကုန်၊ ပြီးပြည့်စုံသော်၊ ရွီတုံပြန်လိုက်၊ ထိုနှစ်မိဂသီ၊ သညီနတ်တော်၊ စေတီတော်ကို၊
ထီးတော်တင်ပွဲ၊ ရွှီချပွဲနှင့်၊ မစဲထိုခါ၊ လူများစွာရို့၊ ကြော်ငြာအုံးအုံး၊ ပျော်မဆုံးသည်၊ ပြည်လုံးအံ့သြမကုန်တည်း။ ။

မဟိံသကအဖိုးသျှင်မှ ကျေးဇူးပြုသည်။